Politika

SDP: Antifašizam jedan od nosećih stubova Crne Gore

Socijaldemokratska partija danas je čestitala svim građanima Dan Evrope i Dan pobjede nad fašizmom, podsjećajući da baštineći antifašizam, kao jedan od njenih nosećih stubova, Crna Gora na najbolji način potvrđuje pripadnost Evropi.

“Ako se narod Evrope mogao izboriti sa zlom fašizma onda i mi moramo više nego ikada čuvati i braniti vrijednosti za koje su mnogi naši najbolji sinovi položili svoje živote. U našem narodu je čvrsta nit antifašističke tradicije. Borba protiv nacionalizma i šovinizma je jedini način očuvanja građanske Crne Gore, oslonjene na vrijednostima koje baštini moderna miroljubiva Evropa”, naveli su u SDP-u.

Kako su istakli, svima koji su dali svoje živote za solidarno društvo jednakosti, a time i takvu Crnu Goru, dugujemo vječnu zahvalnost.

“Naša država će vječno sa ponosom čuvati sjećanje na žrtve koje je dala u antifašističkoj borbi. Deveti maj je istorijska luča koja je obasjala put bezratne Evrope i uvjereni smo da će moderna Evropa naći najbolje modele odgovora na izazove sa kojima se danas suočava, uvijek svjesna da je antifašizam njen noseći vrjednosni stub i civilizacijska vertikala”, naglasili su u Socijaldemokratskoj partiji.

Send this to a friend