Preokretom u nastavku Inter je pobijedio Torino 3:1 i preuzeo drugo mjesto na tabeli Serije A, iako ima isti broj bodova kao Lacio.
“Bikovi” su poveli u 17. minutu, kada je poslije kornera lopta ispala Samiru Handanoviću iz ruku, što je kaznio Andrea Beloti.
Nakon lijepe akcije Intera, Lautaro je proigrao Ešlija Janga, a nekadašnji fudbaler Mančester junajteda iz voleja poslao loptu u mrežu Torina u 48. minutu.
Samo tri minuta kasnije, Aleksis Sančes proigrao je Dijega Godina, da bi iskusni defanzivac glavom pogodio za 2:1.
Konačan rezultat postavio je pola sata prije kraja Lautaro Martinez, istina uz dosta sreće jer je lopta na putu ka mreži “bikova” zakačila jednog igrača Torina.
Nakon ovog poraza, Torino je na 16. mjestu, pet bodova iznad zone ispadanja.
