Vozač Ferarija Sebastijan Fetel ne želi da se bavi prognozama pred drugu trku Svjetskog šampionata za Veliku nagradu Bahreina.
Njemac se nije proslavio na premijeri u Australiji, pošto je zauzeo tek četvrto mjesto i nije bio konkurentan za mjesto na pobjedničkom postolju.
“Bilo je mnogo razmišljanja i velika analiza je napravljena poslije Melburna jer sigurno nismo htjeli da završimo kako smo završili. Ove sedmice su bile naporne ali mislim da imamo neke odgovore. Kao i uvijek, nije moguće naći sve odgovore jer nikad ne možeš da se vratiš i da ponoviš trku”, kaže Fetel i nastavlja:
“Sada smo u Bahreinu, drugačija staza, naučili smo neke stvari o bolidu, o nama i bićemo konkurentniji. Nismo međutim u poziciji da dajemo obećanja. U teoriji treba da sve to pokažemo na stazi. U Melburnu smo bili spori maltene svuda. Jedino u brzim krivinama smo bili dobri i tu se bolid ponašao kao u Barseloni na testovima. U ostalim djelovima staze nije”.
Nedjeljna trka za VN Bahreina počeće u 17.10 sati.
