Muzika film i TV

Napustila nas je prije dvije godine: Ovako je govorila legendarna Mira Stupica

Proslavljena dramska umjetnica Mira Stupica doživjela je moždani udar 19. avgusta 2016. godine.

Samo dva dana prije smrti Mira je proslavila 93. rođendan. Živjela je u staračkom domu u Zemunu, a posjete nije primala jer se nije osjećala dobro. Ipak, obradovala se kada su je na rođendan posetili najmiliji sa poklonima.

U svom posljednjem intervujuu govorila je o svom životu iskreno, bolno, izuzetno.

“Više nisam ono što sam bila. To je normalno, u prirodi je čovjeka da gubi sebe samog. Ali ako je svjestan toga, ako zna to i prati to, i prema tome se ponaša, onda je to pristojno, može da se podnese. U starosti ima teških stvari koje se mogu podnositi. I fizičke i one druge. Što duže živiš, sve više gubiš ono što voliš i one koje voliš. To su strašni životni udari. Ali ja imam tu radost da sam toga svjesna, da to vidim i da se u skladu s tim ponašam. Ne, ne nedostaje mi pozorište. Imam takvu, prilagodljivu prirodu. Tako je kako je. Posljednja uloga je bila filmska, ali ja sam već tu izgubila svoje oružje, nisam tom ulogom bila zadovoljna. Nestalo je moje glumačko oružje. Nestala je moja dubina. Nestalo je ono ne biti banalan, ne biti jeftin, biti izuzetan. A ja više nisam mogla da budem izuzetna”, iskreno je tada rekla Mira.

“Prošla sam i gora vremena. Prošla sam mnogo groznih vremena. Imala sam sreću što ona prolaze i što ih zaboravljamo, pa su stizala nova, druga, bolja. Pa opet dođe neko čudno vrijeme. Kao da se smjenjuju lijepo i ružno, stalno. Ne možete da mislite da je sada najgore, ja znam bolje. Meni je devedeset”.

Na konstataciju da njena ljepota nije nestala ni u devedesetoj, odbrusila je:

“Ma nemoj! Ljepota je teška ponekad. Nije mi to bilo mnogo važno. Zahvalila sam prirodi što imam takve osobine, ženske, dobre, lijepe. Nekada je bilo to naporno podnositi jer je muška okolina bila preaktivna. Morala sam da pazim da budem pristojna, da ne budem vulgarna, prosta. Morala sam vješto da baratam tim stvarima. Bila sam svjesna da sam bila lijepa. Možda ne toliko lijepa koliko zanimljiva za ljude. To je fino, ali treba znati rukovati time. Uvijek sam se bojala da ne povrijedim muškarce u odbijanju. Dovoljno je što je odbijen”.

Na pitanje jesu li nju muškarci povređivali, ko iz topa je odgovarila: Nikad!

U javnosti se posljednji put pojavila u aprilu 2015. godine, na Dan Jugoslovenskog dramskog pozorišta, teatra koji je osnovao njen suprug Bojan Stupica. Sticajem okolnosti, sljedeće nedjelje trebalo je da predsjedava žirijem za dodjelu nagrade “Žanka Stokić”.

Mira Stupica (rođena 17. avgusta, 1923. godine u Gnjilanu) jedna je od najcjenjenijih srpskih pozorišnih, filmskih i televizijskih glumica, koju često prate epiteti najveće srpske glumice.

Debitovala je 1941. godine u pozorištu. Godine 1955. zajedno sa Bojanom Stupicom odlazi u Zagreb, gdje glumi u Hrvatskom narodnom kazalištu do 1957. nakon čega se vraća u Beograd.

Rad na filmu je započela 1951. godine, od kada je ostvarila oko 50 filmskih i televizijskih uloga. Mira Stupica je starija sestra renomiranog glumca, Bore Todorovića i tetka Srđana Todorovića i Dane Todorović.

Send this to a friend