Muzika film i TV

“Pandora” sa Božom je savršen nastavak “Pašane”

FOTO: Danilo Novović

Svjetski priznat bosanskohercegovački interpretator a capella sevdaha Božo Vrećo ovih dana ubira komplimente za tek objavljeni album “Pandora”, a već 24. marta crnogorska publika moći će da se uvjeri u kvalitet novih pjesama na koncertu u podgoričkom Kulturno-informativnom centru “Budo Tomović”.

Čast da zajedničkim snagama sa Vrećom otpjeva naslovnu numeru albuma koji je naišao na više nego pozitivne kritike stručne javnosti pripala je Marku Louisu, višestruko angažovanom umjetniku sa sjedištem u Srbiji. U prošlosti je, između ostalog, naklonost publike osvajao u sastavima St. Louis Band i MaraQYa, ali i numerom “Pašana” takođe sa Vrećom. “Pandora” je minule sedmice “okačena” na YouTube, tako da se brojni poštovaoci Louisovog djela mogu uvjeriti zašto je Vrećo baš po njoj nazvao album. Louis s oduševljenjem priča da je hvaljena pjesma najljepši mogući nastavak uspješne saradnje sa Vrećom.

MAGIČAN, MISTIČAN ARANŽMAN

“Poslije ‘Pašane, ‘Pandora’ je nekako nevjerovatan, savršen nastavak naše saradnje. Melodiju i tekst napisao je Božo, a kada je došao u moj beogradski studio da uradimo drugi dio njegovog albuma rekao mi je da ima iznenađenje pjesmu koju možemo uraditi zajedno. Aranžman je nastao na magičan i mističan način. Tražili smo tonalitet koji odgovara i Božu i meni, na mom sintisajzeru ‘držao’ sam ton i Božo je samo počeo da pjeva. Oni koji poslušaju pjesmu čuće da je taj ton ostao u aranžmanu i provlači se kroz cijelu pjesmu. Taj momenat nikada neću zaboraviti. ‘Pandora’ je jedan od najomiljenijih aranžmana koje sam radio i stvorio u mom studiju”, prisjeća se Louis za Dnevne novine.

VREĆO I JA OPUŠTENA SARADNJA

Naš sagovornik jedini je muzičar koji je vokalno doprinio snimanju dvije pjesme sa Vrećovog novog albuma. Imajući u vidu lijepe komentare slušalaca i odličnu komunikaciju muzičara, sigurno se priča neće završiti na uspjehu “Pašane” i “Pandore”

“‘Pašana’ je početak, a ‘Pandora’ nastavak. Idemo dalje. Divno smo se sprijateljili, postali smo braća, nastupali smo zajedno u Briselu. Imaćemo još međunarodnih koncerata. Sve je prirodno, opušteno kada smo nas dvojica u pitanju. Mnogo je lako sarađivati sa njim”, dodaje Louis.

“Pandora” neće naći mjesto samo na Vrećovom izdanju. Krajem prethodne godine, razgovarali smo sa Louisom i predstavili čitaocima pozadinu njegove duetske pjesme i spota “Pada noć” (ekranizacija urađena u Crnoj Gori) sa pjevačicom Tanu Saxena iz Indije, najavivši pritom da je album “Beskraj” nadohvat ruke. Nešto više od tri mjeseca kasnije, nasljednik izdanja “Shine On Me” kuca na vrata još jače.

“‘Pašana’ je na albumu ‘Pandora, a biće i na mom albumu ‘Beskraj’ koji završavam ovih dana. Nadam se da će do kraja marta album biti gotov. Na njemu će biti i ‘Pada noć, pomenuta pjesma sa Tanu i još neke jako zanimljive kolaboracije”, dodaje Louis.

Podsjetimo, Louis nam je ranije priznao da radi non-stop u studiju na novim pjesmama jer ne voli pauzu.

“Volim da stvaram i volim da završavam projekte koje načnem, a još više volim da dijelim sa ljudima to što mi daje snagu i energiju”, Louisov je životni postulat.

Send this to a friend