Muzičar Željko Bebek (75) je progovorio o detaljima napuštanja grupe “Bijelo dugme” 1984. godine.
Komentarisao je izjavu da su nesuglasice počele zbog pjesme “Kosovska” koju je Goran Bregović (70) napisao na albanskom jeziku.
“Nesuglasice su počele godinu prije, u vrijeme kada je Goran već uveliko odvojen od baze benda, zapravo kada više i nije bio u bendu, već nas je smatrao sastavom koji za njega radi. Kao čovjek koji voli muziku i svoj bend, strahovao sam da se ne ponovi situacija kada je politika već 1976. ušla da napravi dar-mar ‘Bijelom dugmetu'”, započeo je Željko za Večernji list.
“Počelo je da mi smeta to što je Goran počeo da forsira to da rock’n’roll mora da pljuje po nečemu i nisam shvatio zašto nam je bila potrebna pjesma na albanskom. Nisam bio ni protiv te pjesme ni protiv albanskog, ali nisam znao zašto ‘Bijelom dugmetu’ to treba. Živjeli smo u svijetu u kom je taj potez mogao da liči na umjetničku slobodu, a istovremeno je mogao da znači i ovo – ako je već ravnopravnost, onda možemo da pjevamo i na albanskom”, dodao je on.
“To me zapravo učinilo neraspoloženim i tada sam počeo da razmišljam šta to meni treba, meni koji sam htio da pjevam ‘Selmu’, ‘Sanjao sam noćas da te nema’ ili ‘Ne spavaj, mala moja’, pa sad odjednom pjevam pjesmu koja ima drukčiju konotaciju”, rekao je Bebek.
“Osim što sam morao da je naučim i što mi je bilo teško da pjevam na albanskom, morao sam time da prenesem i neku poruku, koja će dobiti odgovor u neko iduće vrijeme. Odgovor je došao već nakon dva mjeseca. Zauzeo sam oštar stav i rekao Goranu: ‘Idemo u novi projekat, OK, ali ovakve poteze više neću tolerisati. Bude li toga, izići ću iz benda'”, kaže Bebek.
“I onda je došao projekat s pjesmama koje nisam mogao da sviram, poput ‘Lipe cvatu’ sa stihom ‘Ravna ti je Jugoslavija’, posebno što je u političkom smislu na ovim prostorima došlo do jako ozbiljnih previranja. Nikada se prije u istoriji nije dogodilo da se iz socijalizma ide u kapitalizam. U to vrijeme počeo je polako da se nazire i dolazak svojevrsne kataklizme, pri čemu nisam želio da određujem stranu, nijednom riječju, nijednom pjesmom, a pogotovo nisam želio da budem u funkciji nekog sastava kom nikada nisam pripadao. Taj status nisam želio da mijenjam i zato je došlo do narušavanja odnosa u bendu i rasprave koja je završila kako je završila”, kazao je Bebek.
“Bijelo dugme je za mene prestalo postojati 1984. Sve ostalo što je radila ekipa ljudi koja je nosila ime Bijelo dugme uopšte me ne zanima, osim što se tokom nekih intervjua prisjetim tih deset godina i glavnog čovjeka koji je zajedno sa mnom kreirao Bijelo dugme i ostao jako važan na muzičkoj sceni na ovim prostorima, Gorana”, istakao je Željko.
