Performans Leta 3 počeo je odmah nakon što je HRT objavio imena izvođača koji će se takmičiti na Dori 2024. Jer, kako tvrdi Damir Martinović Mrle, čija je pjesma ‘Babaroga‘ prošla na takmičenju, riječki rokeri nisu se uopšte prijavili za Doru.
“Nismo se prijavili jer pjesma ne postoji”, kaže Mrle za Jutarnji.hr.
Pa kako su onda članovi HRT-ovog žirija, koji su odabrali 24 pjesme koje će se takmičiti na Dori, čuli numeru ‘Babaroga‘ Leta 3, što je autorski potpisuju Damir Martinović Mrle i Zoran Prodanović Prlja, a koja je, kako saznaje Jutarnji.hr s HRT-a, od strane izdavača grupe Let3 uredno prijavljena?
“Nemam pojma! Izgleda da nas je neko hakovao”, kazao je Mrle, koji na upit hoće li onda Let 3 nastupiti na Dori, kaže:
“Kako da nastupimo s pjesmom koje nema? Ne znam! Čudno mi je sve ovo. Što da radimo”, pita Mrle.
Iz Dallasa ne žele ni potvrditi ni demantovati izjave svoje zvijezde. Kako kažu, baš su na sastancima, javiće se čim završe.
Što se HRT-a tiče, njima se, interesantno, ekipa iz Leta 3 još nije javila kako bi ih obavijestila da su za Doru izabrali pjesmu koju autori, kako tvrde, nisu ni prijavili.
“Sve dok od Leta 3 ili njihovog izdavača ne dobijemo službeno obavještenje kako ih je neko hakovao, odnosno da nisu oni ti koji su nam poslali pjesmu koju je napisao Let 3 i koju pjeva Let 3, neumjesno bi bilo išta komentarisati. U svakom slučaju, sljedeća dva mjeseca neće biti dosadno”, kažu s HRT-a.
